109 skip fingið jólapakkar

Árliga útberingin av jólapakkum til sjófólkið er av á hesum sinni.

Síðstu tveir mánaðirnar hava 1172 sjófólk fingið jólapakkar frá Føroysku Sjómansmissiónini. Tað eru sjómanskvinnuringarnir og onnur, sum vilja gleða sjófólkið, ið hava gjørt pakkarnar. ??tberingina hevur Torleif Johannesen, sjómanstrúboðari, staðið fyri.

Nú allir pakkarnir eru bornir út, hava 109 skip fingið pakkar.

Hesi 109 skipini eru í hesum skipabólkum: 71 fiskiskip, 20 skip í frálandavinnuni, 14 farmaskip og 4 onnur skip.

Hjartans tøkk øll tit sum hava latið pakkarnar, og øll tit sum annars hava verið virkin í Sjómansmissiónini í brátt farna árið. Tøkk eisini fyri forbøn og fíggjarligan stuðul.

Føroyska Sjómansmissiónin ynskir sjófólkunum, sjómanskvinnuringunum og øllum Føroya fólki annars eini gleðilig jól og eitt av Harranum signað nýggjár.

Á myndini: Kurashov Sergiy, skipari á farmaskipinum Silver Fjord, fær pakkar til manningina frá Torleifi Johannesen.

Kelda: trubodin.fo