Jóanis Nielsen
Føroyskt ynski gingið á møti
Løgmaður fegnast um semjuna og sigur, at “Íleggingargrunnurin hevur verið umsitin av føroyskum myndugleikum síðani 1976, men formliga hevur grunnurin ikki verið føroyskur. Longu nakrar vikur eftir, at eg gjørdist løgmaður, tók eg hetta upp við danska forsætisráðharran, og eg havi tikið hetta upp í fleiri umførum síðani. Eg fegnist um, at danska stjórnin nú gongur føroyska ynskinum á møti.”
Nýggj farstøð og avsetan til møguligan Suðuroyartunnil
Nú Íleggingargrunnurin verður fluttur á føroyskar hendur, eru smáar 700 milliónir krónur í grunninum, og nú fáa Føroyar fult ræði á hesum kapitali. Tað merkir, at Løgtingið nú kann raðfesta, hvat fæið í grunninum kann brúkast til.
Løgmaður ætlar, at helvtin av fænum skal brúkast til nýggja farstøð í Vága Floghavn, og hin helvtin skal setast av til møguligan Suðuroyartunnil. Løgmaður ætlar, at fíggingin úr grunnurin skal veitast yvir eitt áramál. Ætlanirnar hjá løgmanni krevja sjálvandi, at undirtøka er fyri hesum í Løgtinginum.
Mynd: Statsministeriet // Stine Tidsvilde
Ein grunnur frá 1964
Endamálið við Íleggingargrunninum er at veita fígging til íløgur, serliga í sambandi við undirstøðukervið. Í gjøgnum árini hevur grunnurin millum annað fíggjað útbyggingar hjá SEV, brúnna um Streymin og ymsar tunnilsverkætlanir umframt nýggj flogfør hjá Atlantic Airways.
Íleggingargrunnurin varð stovnsettur eftir samráðingar millum føroyskar og danskar myndugleikar í 1964 sambært fólkatingslóg.
Upprunaliga fæið í grunninum var 60 milliónir krónur. Ognirnar eru í dag smáar 700 milliónir krónur.
Nevndin í grunninum
Landsstýrið hevur gjøgnum árini valt nevndina fyri grunnin. Í verandi nevnd sita Palli Ziskason, sum er formaður, Anfinn Kallsberg, Guðrið Højgaard, Oyvind Brimnes og Brynhild Høgnadóttir.
Vinarliga broyt tínar kennifíla - og privatlívsstillingar fyri at síggja hetta innihald