Hallur ynskir sær England

FSF: Á middegi í dag, fríggjadagin 13. desembur verður lutakast um, hvussu spælast skal í komandi HM undankapping, sum er á skránni komandi ár.

Áðrenn lutakastið eru Føroyar í styrkisbólki 4, og koma tískil í bólk saman við einum av londunum í stýrkisbólkunum 1, 2 og 3, og møguliga einum landi úr styrkisbólki 5.

– Eg ynski mær fyrst og fremst England úr bólki 1. Úr styrkisbólki 2 kundi eg hugsað mær Ungarn ella Noreg, og úr bólki 3 ynski eg mær Írland. Og eru vit hepnir, og koma í ein bólk við fimm londum, so verður tað vónandi Liktinstein úr styrkisbólki 5. Marrubólkurin hevði verið Sveis, Ukraina, Slovenia og Moldova.

Tað sigur liðskiparin á A-landsliðnum, Hallur Hansson, undan lutakastinum, sum verður í Nyon í Sveis í dag.

Dystirnir í undankappingini til HM 2026, sum verður í Kanada, Meksiko og USA, verða spældir í mars, juni, september, oktober og november í 2025.

Styrkisbólkur 1
Spania, Týskland, Portugal, Frankaríki, Italia, Holland, Kroatia, England, Belgia, Danmark, Sveis og Eysturríki

Styrkisbólkur 2
Ukraina, Svøríki, Turkaland, Wales, Ungarn, Serbia, Pólland, Grikkaland, Rumenia, Slovakia, Kekkia og Noreg

Styrkisbólkur 3
Skotland, Slovenia, Írland, Albania, Norðurmakedónia, Georgia, Finnland, Ísland, Norðurírland, Montenegro, Bosnia-Hersigovina og Ísrael

Styrkisbólkur 4
Bulgaria, Luksemborg, Kosovo, Belarus, Armenia, Kasakstan, Aserbadjan, Estland, Kýpros, Føroyar, Lettland og Litava

Styrkisbólkur 5
Moldova, Malta, Andorra, Gibraltar, Liktinstein og San Marino

Lutakastið byrjar klokkan 11:00, og kann síggjast beinleiðis í sjónvarpinum hjá Kringvarpi Føroya.