Føroyingar royndu seg í Íslandi

Fyrstu árini eftir, at Føroyar fingu fríhandil í 1856, fóru menn og feløg at keypa skip til fiskiskap undir Føroyum. Skjótt fóru teir eisini út um tann føroyska landgrunnin at royna. Í 1860unum vórðu nakrar royndir gjørdar undir Íslandi.

Fransmenn og bretar fiskaðu úti á íslendsku bankunum, men tað gjørdu føroyingar ikki. Føroyar og Ísland vóru í sama ríki. Sum teknar danakongs høvdu føroyingar somu rættindi við Ísland sum íslendingar sjálvir.

Í 1866 fór Jóannes Joensen av Trøllanesi við skonnart síni “Caprice” til Islands við snøri og línu, men har var so nógvur ísur, at teir ongantíð fingu samband við land. Árini eftir vóru ymsar royndir gjørdar, sum eydnaðust betri og verri.

1872 verður roknað sum árið, tá íslandsfiskiskapurin rættiliga tók seg upp. Tá gjørdi nýkeypta sluppin “Fox” úr Havn ein góðan túr við bátum á Seyðisfirði og kom heim við fullari last, sum varð seld í Grimsby.