Jóanis Albert Nielsen
FSF: Føroyska A-landsliðið við kvinnum hevur tveir dystir eftir at spæla í verandi UEFA Nations League kapping. Fríggjadagin í næstu viku er útidysturin móti Moldova á skránni, og týsdagin 3. juni spæla Føroyar og Slovakia á Tórsvølli.
Her fyri kunngjørdi landsliðsvenjarin, Pætur Smith Clementsen hópin til komandi uppgávur, men nú er greitt, at venjarin verður noyddur at síggja burtur frá Petru Hoydal og Rakul Sørensen.
Báðar eru upptiknar við skúlagongd og próvtøkum í hesum døgum, og hava tískil givið avboð.
Í staðin hevur Pætur Smith Clementsen úttikið Brá Zakariasardóttir, sum spælir fyri Fortuna Hjørring í Danmark, og Malenu Olsen úr KÍ.
Undan dystunum eru Føroyar nummar 3 í bólkinum við 9 stigum. Slovakia er fremst við 12 stigum, Moldova hevur 3 stig, meðan Gibraltar er aftast við ongum stigi.
Atgongumerki til UEFA Nations League dystin hjá kvinnum millum Føroyar og Slovakia sum verður á Tórsvølli týsdagin 3. juni klokkan 18:00 fáast til keyps í nethandilinum á FSF.fo og á atgongumerki.fo.
Vinarliga broyt tínar kennifíla - og privatlívsstillingar fyri at síggja hetta innihald