Barnaverndartænastan í Vágum søkir eftir skrivstovufólki

Endamál og uppgávur hjá barnaverndartænastuni
Endamálið við barnaverndartænastuni er at tryggja, at børn, sum vaksa upp undir viðurskiftum, ið kunnu skaða teirra heilsu og menning, fáa neyðuga hjálp og umsorgan rættstundis, og harvið hjálp til ein tryggan uppvøkstur.

Arbeiðsuppgávur hjá skrivara

Tú kemur, í tøttum samstarvi við starvsfólkini í Barnaverndartænastuni í Vágum, at virka sum bindilið ímillum borgaran, samstarvspartar og umsitingina.

Høvuðsuppgávan fevnir um at veita eina góða tænastu til borgarar í Vága – og Sørvágs kommunu, hetta er bæði umvegis telefon, teldupost, og tá fólk koma á gátt.
Arbeiðsuppgávurnar eru fjølbroyttar og til tíðir krevjandi við tíðarfreistum. Journalisering er ein stórur partur av arbeiðinum, og tú kemur eisini at avgreiða smærri málsviðgerðir, so sum hagtalsskráseting, umframt at virka sum skrivari til barnaverndarnevndarfundir.

Førleikar:

Til at røkja starvið krevst:

• Útbúgving sum skrivstovufólk innan fyrisiting ella aðra samsvarandi útbúgving
• Góðar málsligar og skrivligar førleikar, serliga á føroyskum, tó í ein ávísan mun eisini á donskum og enskum
• Góðar talgildar førleikar
• Royndir innan almenna fyrisiting kann vera ein fyrimunur
• Royndir við journalskipanini 360 kann vera ein fyrimunur

Vit leita eftir starvsfelaga, ið:

• Hevur kunnleika og royndir innan journalisering
• Hevur innlit í almennari fyrisiting
• Dugur at arbeiða í toymi og at arbeiða sjálvstøðugt
• Hevur góð evni at samstarva og samskifta
• Hevur gott yvirlit og er røkin
• Er tænastusinnað/ur, fyrikomandi og álitsfull/ur
• Tolir at arbeiða undir trýsti
• Tolir at vera avbrotin í sínum arbeiði

Setanar- og lønarviðurskifti
Starvið er ásett at vera 30 tímar um vikuna, og verður arbeiðstíðin avtalað í samráð við viðkomandi, ið verður settur.

Starvsstaðurin er á kommunuskrivstovuni hjá Vága kommunu í Sandavági, men verður fluttur til Miðvágs í summar.

Løn og sáttmálatreytir eru sambært sáttmála millum Kommunala Arbeiðsgevarafelag Føroya og Starvsfelagið.

Umsókn
Umsókn við prógvum, CV, revsiváttan og øðrum viðkomandi skjølum skal sendast til teldupostadressu: [email protected]  

Ella til:

Barnaverndartænastan í Vágum
Hammershaimbsvegur 1
FO 360 Sandavágur

Umsóknin skal vera Barnaverndartænastuni í Vágum í hendi í seinasta lagi 20. apríl 2025.

Fleiri upplýsingar
Ynskir tú fleiri upplýsingar um Barnavernartænastuna í Vágum og starvið, ber til at ringja til Jenny Petersen, leiðara, á tlf. 794431, ella umvegis teldupost á [email protected].