Verður Vágatunnilin mjólkimaskina hjá Avgjaldssamgonguni?

Í morgin er Vágatunnilin útgoldin, og verður gjald tikið sunnudagin, er talan um nýtt avgjald til ovurnýtsluna hjá sitandi skatta- og avgjaldssamgongu, skrivar Jørgen Niclasen í fyrispurningi til Løgmann. Les spurningin niðanfyri:

§52a fyrispurningurtilLøgmannviðvíkjandi Vágatunnlinum

1. Verður ársaðalfundarsamtyktin hjá p/f Vágatunnlinum frá í fjørð, førd út í lívið í morgin, 10. desember 2016.

2. Nær kunnu kommunurnar í Vágum og lokalu valfeløgini vanta at hoyra frá Løgmanni?

3. Verður frá sunnudegnum 11. desember ókeypis at koyra í Vágtunnlinum, eins og tað er ókeypis í øllum 18 tunnlunum, sum Landsverk umsitur?

4. Hvussu nógv hava brúkarnir av Vágatunnlinum goldið tilsamans øll árini, síðan tunnilin lat upp?

Viðmerkingar:

Í morgin, 10. desember 2016, er Vágatunnilin útgoldin og eisini er peningur tikin inn til at uppdatera tunnilin við. Á ársaðalfundi í fjørð var samtykt, at tunnilin skuldi latast landinum í ár á 14 ára føðingardegnum hjá tunnilinum. Nevndarformaðurin fyri tunnilin segði á tí aðalfundinum, at tað alla tíðina hevði verið teirra greiða mál og fatan og tí vóru bummgjøld eisini løgd eftir tí.

Tá skuldi verða ókeypis at koyra, júst sum politiska avtalan alla tíðina hevur verið. Sum skilst, hevur núverandi landsstýrimaður hjá Javnaðarflokkinum havt ætlanir um at broyta hesa avgerð. Vónandi ætlar landsstýri ikki at gera Vágatunnilin til eina avgjalds mjólkimaskinu hjá landsstýrinum. Í dag er alt goldið og um landsstýrið sunnudagin 11. desember 2016, krevur gjald fyri at koyra í Vágatunnlinum, er talan um nýtt avgjald til ovurnýtslu hjá hesi skatta- og avgjaldssamgonguni. Um so er, er meira enn ivasamt, við hvørji heimild landsstýrið kann áleggja einum vegastrekki í landininum at verða almenn mjólkimaskina.

Í vár vóru kommurnar í Vágum og politisku valfeløgini á fundi við Løgmann um Vágatunnilin. Løgmaður lovaði tá, at venda aftur við eini loysn áðrenn 1. oktober. Nú jólahalgan stundar til, er enn einki komið frá løgmanni.

9. Desember 2016

Jørgen Niclasen,
løgtingsmaður???