Valskrá hjá Trivnaðarlistanum til kommunuvalið 2016

Trivnaður skapar vøkstur og vælferð

Trivnaðarlistin bjóðar seg fram at stýra Vága kommunu. Okkara høvuðsmál er at stimbra vøkstur og vælferð í kommununi við at tryggja trivnaðin hjá borgarunum í kommununi.

Her eru allar okkara ætlanir fyri komandi valskeið:

Mentanar??? og trivnaðarøkið

Hetta er tað, sum vit vilja arbeiða við:

· Skapa eitt trygt og gott ungdómsumhvørvi til okkara børn.

· Ungdómshús skal verða í Miðvági og Sandavági.

· Børn frá 3. - 6. flokk skulu eisini hava eitt tilhaldstað.

· Skúlabussurin skal verða fyri øll børn í Vága kommunu.

· Vísa vælvild við at menna eldraøkið, soleiðis at fyritreytirnar hjá okkara eldru borgarum verða so góðar sum gjørligt.

· Betra um heimatænastuna hjá teimum eldru.

· Ein skipan skal gerast soleiðis, at tilflytarar við útlendskum uppruna fáa møguleika at læra okkara mál og mentan.

· Arbeiðast skal miðvíst við at gjøgnumføra vetrarfriðing í Vága kommunu.

· Lítli Fløttur skal gerast til miðstaðarøki í Miðvági.

· Spæliøkir skulu gerast í Sandavági.

· Trivnaðarøkið skal gerast liðugt í Vatnsoyrum.

· Spæliplássið í Miðvági skal betrast

· Trivnaðarligt kampingøki skal finnast og gerast til veruleika í Vága kommunu.

· Arbeiðast skal við, at Vága kommuna verður millum reinastu og vakrastu kommunur í Føroyum.

· Ferðavinnan skal skipast betur í Vága kommunu. Vit vilja hava ein skipaðan ferðavinnupolitik, har vit eisini hugsa um okkara vøkru náttúru.

· Arbeiðast skal víðari við at betra um bygdagøturnar og skelting.

· Innsiglingin til bátahylin í Miðvági skal broytast, so hann verður tryggari og betri.

· Ein heildarætlan, har hugsað verður um trivna, skal gerast fyri økið við bátahylin.

· Stuðla ítrótti og mentan í okkara kommunu.

· Raðfesta, virða og stuðla sjálvbodnum arbeiði innan ítrótt og mentan.

Tekniska økið

Hetta er tað, sum vit vilja arbeiða við:

· Tekniska deild skal samansjóðast betur. Vit ynskja, at tekniski leiðarin og arbeiðsfólkið húsast undir sama taki. Á henda hátt kunnu vit gagnnýta dygdirnar hjá teimum betur.

· Fólk, sum søkja um ymiskt, skulu fáa eina tíðarætlan, nær teirra mál verður viðgjørt.

· Kommunuskrivistovan í Miðvági skal latast upp fyri viðskiftafólki. Avtalan, sum bleiv gjørd millum Miðvágs- og Sandavágs kommunu, skal virðast.

· Grundstykkir skulu altíð verða tøk í kommununi.

· Vit ynskja at taka samráðingar upp við Bústaðir um at byggja íbúðir til ung og eldri.

· Vegir í kommununi skulu betrast og gerast lidnir. Her verður serliga hugsað um Tvørgarðsveg, Nýggjaveg, Miðbrekku og Kálvalíðveg í Miðvági. Í Sandavági verður hugsað um Traðarveg og Nesaveg.

· Málið er, at allir vegir í kommununi skulu verða tryggar farleiðir.

· Viðgerð av ferðsluforðingum skal ganga skjótari.

· Parkeringsviðurskifti í kommununi skulu betrast.

· Arbeiðast skal víðari við at fáa allar kloakkir út á streymasjógv, soleiðis at kommunan verður rein.

· Afturvendandi trupulleikin við vatntroti í Sandavági og vatntrýsti í ávísum býlingum skal loysast.

· Gera eina heildarætlan fyri grótbrotið í Sandavági, so tað verður til gleði og gagn fyri borgaran.

· 2. byggistig av Skúlanum á Giljanesi skal fyrireikast.

· Spæliøkið við Skúlan á Giljanesi skal mennast í einum samstarvi millum lærarar, næmingar og kommunu.

Vinnan

Hetta er tað, sum vit vilja arbeiða við:

· Vága kommuna skal vera ein framskygd og skapandi kommuna. Tí vilja vit stuðla íverksetarum og veita ráðgeving til íverksetarar.

· Vinnan er ein av grundarsteinunum undir allari vælferð. Vit vilja tí geva vinnuni góðar og tryggar karmar at virka undir.

Fíggjarviðurskifti

Hetta er tað vit vilja arbeiða við:

· Føra ein skynsaman fíggjarpolitik.

· Fíggjarætlanin skal haldast.

· Umraðfesta soleiðis, at vit fáa meira fyri pengarnar.

· Fáa eina kommunala útjavning.

· Arbeiða støðugt við at fáa skattaprosentið niður.