Kvinnudeildin í hondbólti eitur nú Elektron deildin

Hondbóltssamband Føroya (HSF) og Elektron hava undirskrivað samstarvsavtalu, sum í høvuðsheitum merkir, at Elektron verður høvuðsstuðul hjá fremstu kvinnudeildini, ið framyvir fer at eita Elektron deildin.

HSF og flestu føroysku feløgini hava seinastu árini verið í miðvísari menning. Eitt nú eru U8 kappingar settar á stovn, sum hevur økt nógv um tilgongdina av leikarum. HSF hevur brotið upp úr nýggjum við at seta á stovn føroyska venjaraútbúgving, og skipar eisini komandi mánaðirnar fyri talentvenjingum fyri ungdómslið ??? nakað sum framyvir fer at geva ungum leikarum ítøkilig mál at stríðast fyri.

Tað er okkara áskoðan, at um hondbólturin fær røttu umstøðurnar og heldur HSF fram saman við feløgunum at menna serliga ungdómsarbeiðið, eru allar fortreytir fyri, at støðið kann hækka munandi í heimligu kappingini - og at føroyskur hondbóltur tí eisini kann skapa góð úrslit í altjóða hondbóltshøpi.

Her hevur føroyskur kvinnuhondbóltur onga orsøk at smæðast burtur, og er støðið í kvinnukappingini eisini hækkað seinastu árini. Avbjóðingin at halda ungdómi okkara at landinum er stór, og her hevur ítrótturin sín týðandi leiklut. Ikki minst hevur tað alstóran týdning at lívga um kvinnuhondbóltin, sum søguliga er ein hin fremsti kvinnuítrótturin í Føroyum. 

Við samstarvsavtaluni ynskja vit á Elektron at vísa okkara viðurkenning av tí arbeiði, sum tit mongu úti í feløgunum kring landið leggja fyri dagin, og at vit vilja geva HSF eitt íkast til at halda fast við jaligu gongdini.

Við nýggju Elektron deildini fara vit at ynskja øllum kvinnum, monnum og ikki minst ??? okkara ungdómi ??? eitt gott og mennandi kappingarár.