Johannes og Edvard eru ársins leiðarar 2017

Fyri løtu síðani vóru Ársins Leiðarar 2017 kosnir á Hotel Føroyum.

Ársins privati leiðari, Johannes Jensen, Gist og Vist

Ársins almenni leiðari, Edvard Heen, Almannaverkið.

Hetta er trettanda árið á rað, at Ársins Leiðarar verða kosnir í Føroyum. Ársins Leiðari er tignarligasti heiðurin, ið verður latin føroyskum leiðarum.

Soleiðis sigur dómsnevndin um Ársins Leiðarar 2017

Ársins privati leiðari Johannes Jensen, Gist og Vist:

Johannes Jensen

Johannes Jensen hevur við sínum áræði og nýhugsan flutt føroysku hotel- og matstovuvinnuna upp á eitt høgt altjóða stig.

Johannes hevur við sínum brennandi vilja fyri menning og góðsku uppbygt eina stóra fyritøku, sum er væl rikin og áhaldandi í vøkstri.

Johannes hevur á sín miðvísa og sermerkta hátt ment fyritøkuna, og hevur ikki bara sett Føroyar á heimskortið í sínari vinnugrein, men heilt fram í fremstu røð í altjóða høpi.

Johannes er ein fyrimynd á sínum øki, og hansara úrslit prógva, at hann á sín egna og fynduga hátt ger hugskot til veruleika.

Ársins almenni leiðari Edvard Heen, Almannaverkið:

Edvard Heen hevur við sínum áræði og nýhugsan skapt gjøgnumskygni í stóra Almannaverkinum. Hann hevur, hóast avmarkaðar karmar, megnað at lyft støðið og nútímansgjørt henda stóra stovn.

Edvard er við sínum vinarliga, fyrikomandi og lætta lyndi ein góður stjóri, og hann dugir væl at skapa eitt gott arbeiðspláss fyri síni starvsfólk. Starvsfólk, sum hava samband við eitt stórt tal av borgarum.

Edvard er sjónligur á ein virðiligan hátt, hevur lætt við at tosa við starvsfólk og viðskiftafólk, og hann er eitt gott umboð fyri henda so týdningarmikla stovn.

Edvard er jarðbundin, og við sínum róliga lyndi stýrir hann Almannaverkinum á ein tryggan hátt uttan hóvasták.

Í uppskoti at gerast Ársins Leiðari 2017 vóru:

Ársins almenni leiðari | Topp 3 á alfabetiskari raðfylgju:

Edvard Heen, Almannaverkið

Hedvig Johannsdóttir, Dugni

Hilmar Eliasen, Strandferðslan

Ársins privati leiðari | Topp 3 í alfabetiskari raðfylgju:

Frimodt Rasmussen, Klaksvíkar sleipistøð

Johannes Jensen, Gist og Vist

Rógvi Róin, Petur Larsen

??ll kunnu tilnevnda kandidatar til heiðurin, ein dómsnevnd tekur endaligu avgerðina. Í dómsnevndini fyri 2017 sita Annika Sølvará, Granskingarráðið, Eyðun Mørkøre, TAKS og Johanna á Bergi, Atlantsflog.