Jan Elmar Sørensen vann í Sørvági

Fif.fo skrivar: Veðrið var av tí allar fagrasta leygarmorgunin, tá 4. umfar av TF Vetrarkappingini skuldi rennast í Sørvági. Men náttin hevði verið eitt sindur kaldari enn veðurmenninir høvdu spátt, og úrslitið var, at alt var tað bera gler í Sørvági og út eftir Bíggjarvegnum. Tað var ikki hugsingur um at fara at renna kapp.

Tá nú alt fólkið var møtt upp og allar fyrireikingar gjørdar, var tað sera keðiligt at avlýsa ella útseta til annan dag. Sólin var komin fram, og íslagið á vegnum var bara ein millimetur. Kommunan lovaði at koyra til Bíggjar við saltbilinum, og tí var avrátt, at útseta renningina tveir tímar. Leygardagur var, og vituligt skulu fólk so nógv ymiskt. Tíverri vóru nøkur, sum ikki høvdu stundir at bíða hesar báðar tímarnar, men vit meta, at hetta var rætta avgerðin, tí tá renningin byrjaði kl. 13 var púra tátt allan teinin.

Tað var bert tað fyrsta strekkið, sum var eitt sindur hált, annars var púra tátt hjá títt eitt sindur skerda hópinum at renna

Hjá monnunum manglaðu fleiri av teimum, sum plaga at kappast um fremstu plássini. Henry Olsen var møttur, men hevði ikki stundir at bíða, Sam Vang var ikki tilmeldaður og ungi klaksvíkingurin Julian Gregersen hevði meitt sær fótablaðið í fótbóltsleiki.

Jan Elmar Sørensen vann sína fyrstu stóru kapping hjá monnum. Hann og Hallur Hom fylgdust til Gásadalstunnilin, men tá teir vendu og runnu oman aftur móti Bø, megnaði Hallur ikki at fylgja við Jan Elmari í undanbrekkuni. Komnir til Bíggjar var Jan Elmar longu meira enn 100 metrar undan, og kappingin í veruleikanum avgjørd. Munurin á málinum var 37 sekund. Rúni Seloy fekk sítt besta úrslit í vetur og beliv nummar trý stutt aftanfyri Hall.

Jan Elmar Sørensen vann sína størstu kapping nakrantíð. 

Rigmor N. Arge vann sín næsta sigur í vetur. Rigmor rann sera væl í gjár, og vann trygt framman fyri Rebekku Fuglø, sum rann sítt fyrsta umfar í TF-Vetrarkappingini. Hon hevur drigist við ein skaða, men gott at síggja hana í kapping aftur. Duruta R. á Lofti gav Rebekku harða kapping, men endaði góð 20 sekund aftari á triðjaplássi. Ann Thomsen var beint í hølunum á Durutu á fjórða plássi, men kom við góða innsatsinum á pallin hjá kvinnuveteranunum, har hon vann bronsu. Rigmor vann gull og Duruta silvur.

Í kappingini hjá gentunum vísti Maria Biskopstø ræðandi styrki og vann trygt á Oddvør Josephsen og Elin Kristinu Ryan. Móti endanunum var hon um at blanda seg í toppdystin hjá teimum størru dreingjunum. Dreingjakappingina vann Niklas T. Kruse kortini trygt framman fyri Rúna Skarðhamar. Á triðjaplássi kom ungi hósvíkingurin Hans Erland Thomsen.

Gentan, sum aldrin blívur móð. Maria Biskopstø vann gentukappingina

Hjá superveteranunum fingu vit eina spennandi kapping hjá kvinnunum, har Jessie Hansen vann sín fyrsta sigur. Hetta í harðari kapping við Jóngerð H. Høgnesen, sum bert var 11 sekund aftari. Hjá monnunum var gott at síggja Regin Jóanesarson á pallinum aftur. Hann hevði strítt seg gjøgnum kavan úr Vestamnna fyri at vera við í kappingini. Eisini Gunnar Simonsen var á pallinum fyri fyrstu ferð í vetur eftir sítt 2. pláss. Tryggur vinnari gjørdist ikki óvæntað Jens Rikkard av Víkum Weihe, sum stórsigraði á heimabeitinum.

Veterankappingina hjá monnum vann Hallur, Guttorm Sørensen varð nummar tvey og gott at síggja Hjalmar Sjóvará á sigurspallinum eftir sínum bronsumerki.

Fólksligi borgarstjórin í Sørvágs Kommunu, Sune Jacobsen, handaði heiðursmerkini. Hann og Regin hava kenst í mong ár. Sune visti eisini at siga, at Jens Rikkard Weihe er ættaður úr bygdini á Víkum, og at tað ivaleyst eru haðani góðu rennieginleikarnir stava. 

Takk til allar luttararnar fyri tolni at bíða. Og takk til Frælsi fyri stak góða fyriskipan. Og takk til Sørvágs Kommunu fyri salting.

??rstlit TF VK-4 í Sørvági 17_ jan