Helgi Hoydal H71: Málmennirnir vóru framúr góðir

 Vit hittu Helga Hoydal hjá H71 eftir dystin í Vestmanna í kvøld.

Vit spurdu Helga, hvat tað hevði at siga fyri teir at Jónas og Mark ikki vóru við í kvøld?

Helgi: Teir eru tveir av okkara spælstýrarum, so sjálvandi ávirkar tað dystin í kvøld- men Oddur, sum kom inn gjørdi eitt sera gott arbeiði - eg haldi ikki at tað at Jónas og Mark ikki vóru við ávirkaði so nógv, tí vit hava ein breiðan hóp og kunnu næstan altíð seta ein góðan og sterkan mann inn. Vit hava helst Føroya breiðasta hóp, so ein skaði ella eitt leikbann eiga ikki at føra eitt tap við sær.

Men hví taptu tit so í dag?

Málmennirnir vóru framúr, tað vóru verjurnar eisini - Niklas stóð heilt fantastiskt og tað gjørdu Ári og Tóraldur eisini - tað var tað, sum gjørdi dystin so spennandi.

Vit skulu bara verða meira avgerandi, tá ið vit hava kjansirnar - vit brendu alt ov nógv í kvøld.

Hava tit fingið nervar, nú tit hava mist 5 stig av 6 møguligum stigum, teir seinastu tríggjar dystirnar?

Nei tað vil eg ikki siga, tað koma altíð niðurtúrar í eini kapping, fyri okkum í okkara støðu hevur tað ikki so nógv at siga - vit hava mist 5 stig í allari kappingini - tapt tveir dystir og leikt ein javnan, so tað gonngur nokk.

Sí eisini video-upptøkuna niðanfyri, sum er frá teimum seinastu sekundinum av dystinum.