Heimspremiera av filminum JOHN í Miðvági leygarkvøldið 16 november

 Tíðindaskriv.

Heimspremiera av filminum JOHN í Miðvági leygarkvøldið 16 november.

Í morgin hendir tað, ein vágakvinna skrivar seg inn í filmssøguna.

Julia í Kálvalíð úr Miðvági, sum hevur gingið á universitetinum í Tallinn og nomið sær útbúgving innan film og miðlavísund, fer at sýna sín fyrsta film. Julia er eisini fyrsti føroyingur, sum hevur tikið prógv við lærda háskúlan í Tallinn.

Í samband við fráfaringarroyndina, hevur hon gjørt ein film, sum er upptikin í Føroyum við føroyskum leikarum. Hetta er forvitnisligur filmur um mann, sum býr og arbeiðir á bygd í Føroyum. Hesin maður fremur ymiskt, sum ikki tolir dagsins ljós. Søgan er um samband millum menniskju, sálarligar veikleikar og loynidómar.

Leygarkvøldið hin 16 november, verður filmurin JOHN frumframførdur í Bygdaskúlanum í Miðvági. Dyrnar lata upp kl 18.00. Allar leikarar verða við til frumframførðsluna, saman við leikstjóra og hjálparfólki annars. Reyði leyparin verður rullaður út í Miðvági leygarkvøldið, so bygdafólk, og onnur, sum hava hug, kunnu verða við til hesa stórhending!