FTZ: VÍF styrkir hópin til leygardagin

 Í FTZ deildini er í løtuni kapping millum KÍF og VÍF, um hvørt teirra fær finaluplássið ímóti H71, sum higartil í ár hevur vunnið allar sínar dystir og hevur 22 stig fyri 11 dystir. KÍF og VÍF hava bæði 13 stig fyri 10 dystir.

Leygardagin verður dystur í Kollafirði millum KÍF og VÍF, sum kann gerast avgerandi, hvørs teirra fær finaluplássið í FTZ-deildini.

VÍF setir øll segl fyri, teir hava grivið Sámal Joensen og Agnar Joensen fram aftur og í kvøld hava teir gjørt avtalu við Heina Hanusarson, um at hann eisini verður við restina av kappingarárinum.

Hvussu verður við Áka Egilsnes er enn ivasamt, annars ljóðaði fyri tíð síðan, at Áki skuldi til Íslands at leika við IBV, men sum vit skilja støðuna, so er eingin avgerð tikin um tað enn.