![placeholder](https://jn.fo/css/img/banner2x1.png)
Hvønn 3. ársfjórðing skrivar danski tjóðbankin eina stutta frágreiðing um gongdina í føroyska búskapinum. Hon greinar nýggjastu føroysku búskapartølini, eins og samrøður verða gjørdar við viðkomandi føroyskar partar, fyri at fáa eina heildarmeting av búskapargongdini. Niðurstøðan hjá danska tjóðbankanum er, eins og niðurstøðan hjá Búskaparráðnum, at tað er gleðiligt, at føroyski búskapurin hevur framgongd á mestsum øllum økjum. Víst verður tó á, at tað samstundis er týdningarmikið fyri haldbarið, at atlit verða tikin til grundleggjandi avbjóðingar, sum í løtuni standa í skugganum av jaligu gongdini, men sum í longdini koma at hava ein avgerðandi leiklut fyri búskaparvøksturin í Føroyum. Meira ítøkiligt nevnir danski tjóðbankin tær demografisku broytingarnar, sum í framtíðini koma at seta stór krøv til almennu fíggjarstýringina, og tær skattaserskipanir, sum geva ein støðugan pengastreym til nógv føroysk húsarhald, men sum samstundis hava eina skeiklandi ávirkan á skattagrundarlagið og arbeiðsmegina í Føroyum.
Hetta eru viðurskifti, ið m.a. Búskaparráðið og Føroya Arbeiðsgevarafelag í fleiri umførum hava víst á, og tí er at vóna, at eitt politiskt fokus nú verður sett á hesi øki.
Føroya Arbeiðsgevarafelag heldur, at umráðandi er at gera hesar broytingar, meðan gongdin í samfelagnum er góð, og ikki lata vaksandi inntøkur verða eina forðan fyri nýskipan. Fæst landskassahallið burtur í 2016, so hevði tað verið frálíkt, men hetta í sær sjálvum loysir ikki meira grundleggjandi vansarnar, sum í longdini kunnu fáa alvarsamar avleiðingar fyri føroyska samfelagið. Tað snýr seg í stóran mun um broytingar í skattaskipan okkara, har ein breiðkan av skattagrundarlagnum er neyðug mótvegis einum lægri skatti á lønarinntøku. Skattur á lønarinntøkuna skal niður, soleiðis at Føroyar gerast kappingarførar um arbeiðsmegina, samstundis sum skattagrundarlagið skal breiðkast, soleiðis at skattatrýstið verður býtt javnari og meira effektivt á føroysku borgararnar.
Vinarliga broyt tínar kennifíla - og privatlívsstillingar fyri at síggja hetta innihald