Dávur vísti hvar skápið skuldi standa

Súkkling og triathlon í Føroyum skrivar:

Sambært kappingarkalendarinum skuldi kappingin verða í Vágunum. Men eftirsum at sterki einkultstartssúkklarin, Jóanis Albert Nielsen, hevði boðað frá at hann ikki kundi luttaka vegna sjúku, so avgjørdi nevndin at flyta nærri Havnini. Kappast var á teininum millum Kaldbaksbotn og Kaldbaksbygd, og hesin teinur skuldi koyrast hálvatriðju ferð, umleið 18 kilometrar.

Uppmøtingin var sera góð, og umstøðurnar at kappast vóru somuleiðis sera góðar.
Favoritturin vann. Ella ...! Tá allir vóru komnir á mál varð farið at roknað. Guðmundur Joensen er sera sterkur í hesari grein, men tað er Dávur Magnussen eisini. Tí bleiv bíðað í spenningi hvat úrslitið gjørdist.
Tað gjørdist ikki Guðmundur, ið fór við sigrinum, men Dávur Magnussen. Og tað bleiv so enn ein sigur til Dávur, ið hevur vunnið allar kappingar, ið Tórshavnar Súkklufelag hevur skipað fyri í hesum kappingarárinum. Heldur óvæntað var tað Gunnar Dahl-Olsen, ið gjørdist næstur á 18 kilometur langa teininum.
Vinnarin vann eitt gávubræv frá Yndi. Nummar tvey og trý vunnu gávubræv frá Súkkluverkstaðnum hjá Gunnari.