Broyting í skipanini av fiskiskapinum eftir norðhavssild í 2016

 Høgni Hoydal, landsstýrismaður í fiskivinnumálum, hevur gjørt av at broyta skipanina í fiskiskapinum eftir norðhavssild, so at nótaskip og ídnaðarskip nú kunnu fiska av kvotunum, ið upprunaliga vórðu settar av til hjáveiðu í øðrum fiskiskapi og til vísindaligar rannsóknir.  

Í sildakunngerðini eru 2.000 tons sett av til hjáveiðu í m.a. makrelveiðu. Tølini vísa, at higartil eru fiskað góð 500 tons av hesi kvotu, og útlit eru ikki fyri, at kvotan fer av verða fullnýtt í ár. Tey 500 tonsini, ið eru sett av til vísindaligar kanningar, verða ikki brúkt í ár.

Sildakunngerðin sigur, at um líkindi eru fyri, at kvotur ikki verða brúktar, kann landsstýrismaðurin loyva nótaskipum og ídnaðarskipum at fiska av kvotunum.

Broytingin ber í sær, at nótaskip og ídnaðarskip kunnu fiska 1.800 tons av norðhavssild afturat. Kvotan verður býtt millum skipabólkarnar eftir vanliga leistinum.

Tey, ið ætla at fiska av hesum kvotum, skulu søkja Vørn ??? Fiskiveiðieftirlitið ??? um fiskiloyvi.

Sí nærri á www.vorn.fo.