Borgarstjórarnir í Sandoynni fegnast

Borgarstjórarnir í Sandoynni fegnast um at túratalið um Skopunarfjørð álíkavæl ikki lækkar.

Borgarstjórarnir ásanna, at neyðugt hevur verið at gjørt nakrar tillagingar í ferðaætlanini, soleiðis at onkrir túrar eru fluttir, hetta fyri at uppfylla altjóða krøv. Tí er at fegnast um, at gjørligt hevur verið at funnið annað pláss í ferðaætlanini, soleiðis at samlaða túratalið verður óbroytt.

Broytingarnar hava við sær, at tænastan um Skopunarfjørð verður munandi betri fyri vinnulívið, samstundis sum skúlanæmingar, pendlarar og summargestir í oynni lættari kunnu koma í oynna. Somuleiðis hevur tað stóran týdning fyri pendlararnar, at teir túrarnir sum hesir borgarar okkara brúka, hereftir verða sigldir beinleiðis suður.

Borgarstjórarnir fegnast um, at nýggja leiðslan á SSL og landsstýrismaðurin hava víst vilja at funnið loysnir, og hava lurtað eftir ynskjum úr Sandoynni, nú nýggj ferðaætlan er løgd.

Brandur Sandoy, borgarstjóri á Sandi

Gerhard Lognberg, borgarstjóri í Skopun

Jákup Martin Sørensen, borgarstjóri í Húsavík

Anita Joensen, varaborgarstjóri í Skálavík