Betri umstøður og viðgerð til sálarsjúk

Viðgerðartilboð og -umstøður hjá sálarsjúkum eru út av lagi vánaligar í Føroyum, og hetta má og skal broytast. Tíanbetur hevur meira fokus verið á hetta økið tey síðstu árini, og tað er gleðiligt at síggja tær broytingar, ið eru hendar.

Bíðitíðin til barna- og ungdómspsykiatri er burtur
Miðflokkurin hevur m.a. verið við til at fingið ein ungdóms- og barnapsykiatara. Hetta hevur havt við sær, at bíðitíðin, ið var 2½ ár við 150 børnum/ungum á listanum, nú er einans 20 fólk, og er tí komin niður á tað, man kallar eina náttúrliga bíðitíð.

Eitt annað, ið vit kunnu gleðast um, er sambýlið Eystan Heyg, har fleiri av teimum, sum í fleiri ár hava búð á psykiatriska deplinum, nú búgva. Eisini var skjøtulin settur á stóru útbyggingina av Landssjúkrahúsinum 23. februar 2015, har psykiatriski depilin fer at flyta oman. Prosjekteringin er liðug og tíðarætlan løgd. Í nýggju hølunum fara umstøðurnar fyri viðgerð at vera munandi betur enn í verandi hølum.

Til síðst kann eisini nevnast, at tað er eitt stórt framstig at hava fingið sálarfrøðing á miðnámsskúlarnar, og seinni í ár verður gongd sett á økispykiatriina í Suðuroy og í Vágunum.

Men enn er nógv, ið skal gerast
Millum annað fer Miðflokkurin at arbeiða fyri at fáa eina sálarliga skaðastovu, so at fólk við bráðfeingis tørvi á sálarligari hjálp ikki vera vend í dyrnum við boðunum um, at tey skulu koma aftur um 3-4 vikur.

Eg vil tí arbeiða fyri:

· at stuðulin til at fara til sálarfrøðing hækkar, so manglandi fígging ikki er ein forðan fyri at fáa tað hjálp, einum tørvar

· eini skipan líknandi tí við tannlæknum, har ein fær fría viðgerð hjá sálarfrøðingi til ein er 18 ár

· at umstøðurnar á psykiatriska deplinum nú og til nýggju hølini eru liðug betrast munandi

· at fáa eina sálarliga skaðastovu

· at betra um karmarnar hjá økispsykiatriini

Hugsa eisini um tey sálarsjúku, tá tú setur krossin tann 1. septembur.

Lív Justinussen

Valevni fyri Miðflokkin

Les fleiri lesarabrøv her.