2015-03-18 17:59 
Jóanis Albert Nielsen
Jóanis Albert Nielsen
Fyri nøkrum døgum síðani varð oyggjaríkið Vanuatu í Kyrrahavinum rakt av eini ógvusligari náttúruvanlukku, har ein ódn legði nær um alt landið í oyði.
Fólk hava latið lív og meginparturin av tjóðini er vorðin heimleys. Upp í 90% av húsunum í høvuðsstaðnum eru burtur, og alt infrakervið er í sorli.
Í Vanuatu - sum gjørdist sjálvstøðug tjóð í 1980 - búgva góð 200.000 fólk. Talan er um eitt oyggjasamfelag við 85 oyggjum, har fólk býr á 65 teirra. Landaøkið er tilsamans góðar 4.700 ferkilometrar - á leið tríggjar ferðir størri enn Føroyar.
Lutfalsliga í mun til stødd og fólkatal er talan um eina ta størstu náttúruvanlukku fyri eina tjóð yvirhøvur, sum vit vita um.
Ikki eigur at vera trupult hjá okkum í Føroyum at skilja, hvussu út av lagi ring støðan er hjá fólkinum og myndugleikunum í Vanuatu, og hvussu stórur tørvur er á hjálp.
Tí verður hervið heitt á Landsstýrið um beinanvegin at veita neyðhjálp til Vanuatu.
Vinarliga
Høgni Hoydal
Formaður í Tjóðveldi
Vinarliga broyt tínar kennifíla - og privatlívsstillingar fyri at síggja hetta innihald