Alt fyri sosialismuna

Sosialisman skjótt kostað okkum 1000 arbeiðspláss

Uml. 400 arbeiðspláss eru sett í vanda á góðskingarvirkinum hjá Bakkafrost á Glyvrum og uml . 250 arbeiðspláss umborð á fiskiskipum í Barentshavinum. Soleiðis setir sitandi sosialistiska samgongan uml. 650 góð og trygg arbeiðspláss í vanda í okkara høvuðsvinnum. Við hesum missa kanska uml. 650 familjur sítt fíggjarliga tilverugrundarlag og landskassin missir 100 tals milliónir. Aftrat hesum koma nógv arbeiðspláss í avleiddum vinnum.

Hetta eru júst fólk, sum vinstrivongurin sigur seg skulu arbeiða fyri – fiski- og verkafólk. Samgongan hóttir nú teirra tilverugrundarlag. Hevur samgongan nýggj arbeiðir at bjóða teimum, ella skulu tey koma við hattinum í hondini og biðja um sosialistiska olmussu ? Er tað kanska tann djúpara meiningin við hesum politikkinum ?

Fyrr í summar minkaði Bakkafrost um sínar íløguætlanir í Føroyum fyri ístaðin at vaksa um íløguætlanirnar í Skotlandi. Eisini her vóru tað broyttu fortreytirnar við hækkaðum tøkugjaldi saman við manglandi visiónum hjá politikarunum sum vóru orsøkin. Tá mistu vit 100 arbeiðspláss av landinum og íløgur fyri 5 milliardir.

Skandalir í kø

Skandalirnar hjá hesi samgonguni hópa seg upp, og vit hava neyvan sæð tað síðstu enn. Teir ikki bara fjerna verandi arbeiðspláss, men forða eisini fyri nýggjum framtíðar arbeiðsplássum. So ólukkurnar standa í kø og allar eru sjálvgjørdar. Áðrenn vit hava vent okkum, eru vit 1000 arbeiðspláss fátækari alt íroknað !

Hevur landstýriskvinnan í fíggjarmálum Ruth Vang eitt boð uppá hvar hesar 100 tals milliónirnar skulu koma frá ? Skulu fleiri fólk uppí ALS ? Hvat við vallyftunum um lønarlyft og styttri arbeiðsviku? Trúgvi nógv fáa stutta arbeiðsviku ófrívilliga. Skulu Palleba og Marsanna knokkroytast enn meir? Hevur hon sum ein borgarligur politikkari veruliga samvitsku til at vera partur av hesum skandalustýrinum ?

Landstýrismaðurin trýr ikki vinnuni

Landstýrismaðurin í vinnumálum Høgni Hoydal trýr ikki stjóranum á Bakkafrost, tá hesin sigur, at við hækkaða tøkugjaldinum verða uml. 400 arbeiðspláss sett í vanda. Landstýrismaðurin í vinnumálum veit betur enn vinnan sjálv og sigur, at tað sømir seg ikki stjóranum at koma við slíkum hóttanum móti vanligum arbeiðsfólki og tosar niðursetandi um stórkapitalin.

Sosialistisku hógvarnir koma tíðiliga til sjóndar. Sterku og framkomnu fyritøkurnar skulu knokkroytast í skattum og avgjøldum og ofrast á sosialistiska altarinum. Tær skulu gerast veikar og tannleysar, so landstýrismaðurin fær alt vald. Kosta hvat tað kosta vil. Stórkapitalurin skal vekk, tí hann hevur ov stórt vald. Alt vald til landstýrismannin.

Havnastongsulin

Havnastongsulin fyri russiskum skipum hevur stórar avleiðingar fyri okkum. Fyrstu úrslitini hava vit longu sæð, men samgongan letst ikki um vón. Havnastongsilin kostar arbeiðspláss og 100 tals milliónir í mistum inntøkum. Meðan Normenn steingja nakrar týdningarleysar havnir, steingja vit allar havnir.

Berlingske Tidende hevur gjørt áhugaverda greining av handilssamstarvinum millum Europa og Rusland. Niðurstøðan er, at nógv meir flótandi gass verður keypt úr Ruslandi nú enn áðrenn kríggið.

Skal hinvegin skunda mær at siga, at eg førdømi øll kríggj.

Avleiðingar kring alt landið

Hesin sosialistiski politikkurin – um hann blívur gjøgnumførdur sum ætlað – fær stórar negativar avleiðingar kring alt landið á flestu arbeiðsøkjum. Hetta hevur fólkaflokkurin so ofta ført fram. Men eisini Tórshavn, har hendan samgongan hevur sítt tilverugrundarlag merkir nú sviðan. Mistar inntøkur frá trolarum, mistar inntøkur til Tórshavnar Havn, mistar inntøkur frá tænastuvinnum av ymsum slag, veitingarvinnum, proviantering, catering, ja enntá matstovuvirksemi fer at merkja sviðan.

Hetta er júst tað, sum vit í fólkaflokkinum altíð hava sagt. Fiskivinnan og alivinnan eru grundsúlurnar undir øllum. Leggja vit fótonglar fyri tær, so ávirkar tað alt samfelagið fyrr ella seinni.

Vónandi broytir samgongan sín illvilja móti okkara høvuðsvinnum og øðrum vinnum eisini.

Elsebeth Mercedis Gunnleygsdóttur
Løgtingslimur