Aftur val! Men ongan valfund. Góð byrjan má sigast

Aftur val! Men ongan valfund. Góð byrjan má sigast!

Eitt íkast til valið í her vestri.

Hví taka vit ikki fyrilit til byggisamtyktina, sum er langtíðarplanlegging?

Sitandi bygdarráð hevur fingist nógv við vegir, hevur í eini handavend lagt kilometrar av tekniskum leiðingum - fyri at asfalti ikki skal pløgast upp aftur - og nógv er asfalterað og tað er gott!

Men vit eru allarhelst øll samd um at her er ongin funnin frensur ella ábending til endaliga loysn av vegakervinum ígjøgnum Sørvág.

Í byggisamtyktini fyri Sørvág er eitt uppskot til skilagóða skipan av vegakevinum í Sørvági og ígjøgnum Sørvág: Høvuðsvegurin er eftir gamla vegnum – Varðagøtu – ígjøgnum kommunuskrivstovuna og við brúgv um Stórá oman í Niðaraveg , við teymi úr Niðaravegi í bíggjarvegin, og út á Bakka.

Tit kunnu seta allar teir ekspertar til vilja, tit finna ikki betur loysn á høvuðsferðsluni ígjøgnum Sørvág, tí hon tekur fyrilit fyri øllum ágóðum og vansum sum hugsast kunnu.

Vansar eru! Tað sigur seg sjálvt at tey framvið gamlavegi – Varðagøtu – verða ikki glaðast fyri at tunga ferðslan verður løgd her. Men fyrimunirnir eru risastórir fyri bygdina sum heild. Saman við teyminum úr Niðaravegi í Stangarvegin slepst til Bíggjars, til PE, Til vøllin til kirkjuna og skúlan uttan at koyra ígjøgnum bygdina yvirhøvur. Ferðslan í bygdini, har flestu sethúsini eru, kann tá skipast eftir teirra tørvi. Antin sum einvegis gjøgnumkoyrandi ferðsla, ella uttan gjøgnumkoyring.

Hugsi tykkum at undanfarna bygdaráð, og bygdarráðini undan teimum, hevði ein plan: Vit dagføra verðandi veg igjøgnum bygdina, men Varðagøta verður skipað sum høvuðsferðsluæðr. Arbeiðið verður gjørt í stigum yvir næstu 12 árini!

Vit hava sæð at brúk er bert fyri einari ferðsluæðr ígjøgnum Sørvág og at Varðagøta longu hevur ligið brakk í longri tíð, um ikki áravís. Tíverri er ongin planur – byggisamtyktin ikki lisin - og allarhelst taka nú nýggju teknisku leiðingarnar heldur ikki fyrilit fyri at Varðagøta skal hava annan vegprofil um høvuðsferðslan einaferð skal verða her.

Í byggisamtyktini liggur eisini ein farleið til veg, av bakkanum uttanum bygdina niðan á Mýrar har samband er til Landsvegin. Men álvaratos! Royn og hugsa tankan! Ger hann ikki líka stóran skaða har hann verður lagdur og er ferðslan ígjøgnum bygdin harvið loyst?

Niðarivegur er og verður partur av høvuðsferðsluæðrini ígjøgnum Sørvág. Vegurin er einasta farleið til tunga ferðslu! Niðarivegur kemur at geva avbjóðingar framyvir. Eg haldi at ov lítið varð hugsað, haldi faktiskt at tað varð lopið á bláman, uttan at hugsa, tá ið – pengarnir vóru nógvir og - grótgarðurin í ovara borði varð lagaður. Skilabetur hevði verið at hækkað gamla garðin við einum metri ella so. Garðurin í ovara borði hevði verið tað lægri og vegurin tað hægri. Tað høvdu vit kunna liva við og farleiðin hevði verið tryggari.

Høvuðs valfleski til síðsta val var ein ítróttarhøll. Ein ordilig høll!

Hon kom ikki. Men ein nýggj staðseting er komin í ljósmála. Uppi við Alvalon, har framtíðar barnaansingin skuldi vera.

Er tað nú so skilagott at leggja eina ítróttarhøll, enntá eina ordiliga høll, her.? Høvuðsferðsluæðrin røkkur ikki niðan, hví so leggja eina so ferðslutunga høll her og toga allar bilarnar niðan her? Her rundanum Alvalon har bøurin og nátturan er næsti granni? At her varð planerað fyri vøggustovuni, er tað eitt argument fyri at leggja høllina her? Eina høll til 80 mill.kr.?

Vit fingu onga høll, men fótbólturin fær sítt og fótbólturin skal hava sítt.

Harmiligt at kommunurnar í oynni ikki- í tøkum tíma - funnu saman um eitt felags ítróttar- og mentanarligt projekt. Men soleiðis skuldi ikki verða og nú Dungasandur hevur tikið skap av einum stórstadion vendist nokk ikki aftur. Tørvurin á hølum vil halda fram at økjast og tí eigur høllin eisini at planleggjast her. Ikki ímillum kirkjuna og vøllin, men ytri.

Annar møguleiki er at kommunurnar verða lagdar saman. Havi altíð hildið at Sørvágs Kommuna við flogvøllinum er, upp í leypar, meiri týdningarmikil fyri Vága Kommunu enn Vágakommuna er fyri Sørvágs Kommunu.

Einaferð kemur tunnilin, og hann kemur til Vatnsoyrar. Annað er fjákalótir. Tunnilin er stytsta leið hjá føroyingum at koma til fogvøllin og flogvøllurin verður tá verðandi her.

Tá ið tunnilin er komin, kann vatnavegurin, vegurin framvið Leitisvatni – ongin vegur er framvið Sørvágsvatni – avtakast og leggjast aftur sum náttura, hagi og gøtur til fæ og fólk.

Hettar hendir, og skal ikki henda nakrantíð, men burdi lýst støðuna um hvussu týdningarmikil flogvøllurin er fyri oynna og Vága Kommunu, sum enn liggur í ferðslustronginum.

Tí burdi Vága Kommuna rætt okkum hondina til komunusamanlegging við einum útspælið um at bygt felags fótbóltstadion, felags høll, eina ordiliga høll sum summir sørvingar siga, við møguleikum til seinni byggingar av svimjihøll og eini fótbóltshøll etc..í Brennuni, har torvið varð grivið, sum liggur ávegis úr Vatnsoyrum niðan flogvøllin. Hetta hevði tænt allari oynni og vit høvdu fingið okkurt at verði felags um, sum hevði sjóa okkum saman. Tað gevur onga meining hjá okkum at leggja saman bara fyri at fáa eina betri fyrisiting/umsiting, men verri hevði tað so ikki verið.

Hettar hendir sjálvandi heldur ongantíð, men við eini slíkari ætlan í ljósmála, kundi Sørvágs Kommuna útbygt høllina við skúlan, samb. ætlanini hjá bygdarráðnum undan hesum, til minnið enn helvtarkostnað av 80.000.000,-kr.