Samlega við børn er altíð neyðtøka

Nú kemur nýtt lógaruppskot um samtykkisgrundað neyðtøku, og tað fegnast vit um. Men í gjár bleiv greitt, at nýggja lógaruppskotið ásetir ikki, at "samlega" við eitt barn undir 15 ár er neyðtøka og skal revsast harðari enn í dag. Revsiramman skal vera 12 ár og ikki 8 ár sum í dag.

Vit vilja tí taka stig til antin at fáa hesa broytingina í uppskotið undir løgtingsviðgerðini. Um hetta ikki er møguligt, fara vit at leggja eitt sjálvstøðugt uppskot fyri Løgtingið um hetta.

Tað er eyðsæð, at einki barn undir 15 ár er í eini støðu, har tað ber til at geva sjálvboðið samtykki til samlegu við ein persón, ið er munandi eldri enn barnið.

Hetta fer at merkja, at barnið fær eina betri verju enn í dag. Tað eru fleiri dømi um, at persónur, ið hevur gjørt seg kynsliga inn á børn undir 15 ár, hevur fingið linari dóm, tí mett hevur verið, at barnið kanska ótilvitað hevur góðtikið støðuna.

Eyðgunn Samuelsen

Ingilín D. Strøm

Djóni Nolsøe Joensen

Løgtingslimir fyri Javnaðarflokkin