Neistin við í Partille Cup 2018

ítróttur03-07-2018 - 08:08 - Jóanis Albert Nielsen
Siðvenja er, at Neistin annaðhvørt ár luttekur í heimsins størstu hondbóltskapping Partille Cup.
Í ár er einki undantak í so máta. Saman við yvir 20.000 hondbóltsleikarum úr øllum heiminum,
er vælmannaður hópur, uml. 200 fólk úr Neistanum í hesum døgum í Gøteborg til kappingina.
Partille Cup 2018 byrjar í dag, týsdagin 3. juli, og 10 lið úr Neistanum fara í eldin at kappast.
Seinastu dagarnar er streymur av Neistafólki farið til Gøteborg, har kappingin verður hildin.
Fyrstu fóru við Norrønu hósdagin og fleiri fóru við flogfari leygardagin og sunnudagin.
Umframt Neistan, er eisini føroyska U16 landsliðið við gentum við í European Open kappingini,
sum eisini er í Gøteborg hesa vikuna. Neistin er eitt av størstu hondbóltsfeløgunum í Føroyum,
og hevur nógv virksemi alt árið runt. Umframt hondbóltsliga menning, verður í felagnum stórur dentur
eisini lagdur á trivnað og samanhald. Hondbóltsferðin er einki undantak, og gott høvið at samansjóða
øll tey mongu, sum eru partur av Neistanum, leikarar, foreldur, venjarar og hjálparfólk annars.
At venja fram til altjóða kapping, spæla dystir, og annars hitta aðrar hondbóltstjóðir er hondbóltsliga
mennandi fyri leikarar í øllum aldri. Neistin metir seg fáa væl burturúr ferðunum til Partille Cup og
gleðir seg at fylgja liðunum komandi dagarnar.