Anna Sára.

Flogbóltur, meistaradeild kvinnur: Fleyr vann greiðan sigur á meistarunum

ítróttur08-11-2017 - 10:32 - Jóanis Nielsen

Dráttur, sum gjørdist føroyameistari í fjør, hevði ikki eydnuna við sær, tá liðið var á vitjan í Gundadalshøllini í gjár. Fleyr vann dystin við trimum settum móti ongum

Fleyr – Dráttur 3-0 (25-10, 25-12, 25-16)

Fleyr legði seg einsamallt á annaðpláss í kvinnukappingini, tá liðið í gjár vunnu ein tryggan 3-0 sigur á føroyameistarunum úr Drátti.

Havnarkvinnur vóru greitt omaná frá byrjan og vunnu fyrsta sett við 25 stigum móti 10.

Munurin tódnaði eitt elalítið sindur í øðrum setti, sum Fleyr vann 25-12, og uppaftur eitt sindur afturat í triðja setti. Men munurin gjørdist tó ongantíð so lítil, at tað gjørdist spennandi millum hesi bæði liðini.

Seinasta settið endaði 25-16 til Fleyr, sum sostatt vann dystin við trimum settum móti ongum.

Fyri Fleyr var sigurin kærkomin eftir at tær á heimavølli taptu 3-0 móti Mjølnir fyri nøkrum vikum síðan. Munurin í tí dystinum var ikki eins stórur og hann var millum Fleyr og Drátt í gjár, men tó greiður nokk.

Hóast stutt er fráliðið, og tað tí ikki er ráðiligt at siga nakað endaligt um nakað sum helst, so hava fyrstu dystirnir í ár givið ábendingar um broytingar samanborið við kappingina í fjør.

Eitt er, at føroyameistararnir úr Drátti bara hava vunnið ein av fýra dystum higartil, eitt annað er, at KÍF, sum var hitt liðið í kvinnufinaluni í fjør, heldur ikki er komið so væl ígongd.

Hinvegin tykist, sum eru gomlu kempurnar, Mjølnir og Fleyr, vaknað úr dvala. Og serliga sær Mjølnir út til at vera øgiliga sterkt í ár. Higartil hava tær spælt tríggjar dystir, og

klaksvíkskvinnur hava vunnið teir allar 3-0.

Fleyr hevur tapt ein av trimum, tann móti Mjølnir og er tí eisini væl við í kappingini.

Í annaðkvøld fáa vit at síggja, hvussu leikur fer í Sørvági, har SÍ og KÍF fara at spæla.