Eysturoyggin og Runavíkar kommuna við skerdan lut

politikkur18-09-2020 - 11:14 - Jóanis Nielsen

Lutfalsliga er Eysturoyggin við við skerdan lut tá tað kemur til ársverk hjá landinum, (sí talvu) í mun til fólkatali. Eysturoyggin er afturútsigld á so at siga øllum økjum, tá tað snýr seg um almennar stovnar, og almenn ársverk, og tað tykist sum bert Klaksvík (12% av fólkatalinum) og Suðuroyggin (9,3% av fólkatalinum) eiga lut í almennum stovnum og ársverkum, meðan Eysturoyggin hevur 22% av fólkatalinum, men lítlar og ongar sømdir tá tað kemur til almenn ársverk og almennar stovnar í mun til fólkatalið.

Sambært talvuna hjá Fíggjarmálaráðnum fær Eysturoyggin bert 128,6 mió., meðan lutfallið í mun til samlaðu útreiðslurnar átti at hækkað við 260,9 mió. kr., og ársverkini hækka við meira enn 600 ársverkum.

Hetta hevði ført til eina meiri inntøku uppá uml. 52 mió. kr. í kommu kassanum hjá kommununum í Eysturoynni, og um hesar upphæddir vóru býttar í lutfallinum til kommunurnar í Eysturoynni, kundi t.d. Runavíkar Kommuna haft eina meiri inntøku uppá millum 25 og 30 mió. krónur. Ein slík upphædd hevði gjørt góðan mun, t.d. til:

• Miðja framímóti at lækkað skattaprosentið, og tænastugjøld.

Seta størri ferð á útstykkingar av grundstykkjum til sethús og vinnufyritøkur, og byggibúgva grundøkir

til móttøku av almennum stovnum.

• Byggja svimjihøll og ítróttahús til NSÍ.

Útbyggja Runavíkar Havn, og tryggja øll hugsandi Markvirðir.

Møguleikarnir eru nógvir, eins og støðan kundi verði hin sama fyri hinar kommunurnar í Eysturoynni,

... VIT ERU IKKI SUM HINI – LATA ALT UM OKKUM GANGA ...., og rætt hevur tú Dávur:“... rinda inn í tann stóra pottin, men fáa ikki annað enn molarnar, ið fella á gólvi afturfyri”.

Er tað rætt og rímiligt at t.d. Klaksvík og Suðuroyggin fáa 100% fleiri ALMENN ársverk enn Eysturoyggin, tá fólka grundarlagið er líka stórt sum Klaksvík og Suðuroyggin tilsamans?

Klaksvík og Suðuroyggin fáa almennar skattakrónur í sínar kassar, sum av røttum, skuldi enda í kommunukassunum hjá kommununum í Eysturoynni. Hetta er ein sera álvarsom avbjóðing sum hevur lagt stórt trýst á allar skattaborgarar í Eysturoynni, og ikki minst á størstu kommununa í Eysturoynni: Runavíkar Kommunu, og tí er neyðugt at fremja broytingar ongantíð ov skjótt á hesum øki.

Í sambandi við hesar viðmerkingarnar havi eg loyvt mær at vísa til framúr góðu midnáttarrøðu hjá Dáva Høgnasyni, sum hann helt leygarkvøldið 13. juni 2020 á Eystanstevnu, sum hann kom sera væl frá; neyvur, nágreiniligur, gløggur og beinrakin. Røðan kann lesast á heimasíðuni hjá Runavíkar Kommunu:https://runavik.fo/tidindi/midnattarroeda-hja-dava-hoegnasyni/. Sí eisini brot úr røðuni á hjáløgdu mynd.

Lasse Klein