Bretska koronufrábrigdið er nú staðfest í Føroyum

corona24-01-2021 - 17:59 - Jóanis Albert Nielsen

Herfyri varð ein persónur úr Afrika staðfestur smittaður við kanningini á sætta degi. Frá komu til Føroya hevði viðkomandi verið í sóttarhaldi, og hevði einans havt samband við ein annan persón.

Heilsufrøðiliga starvsstovan hevur greinað kanningarúrslitið hjá viðkomandi nærri, og greiningin vísir, at talan er um bretska frábrigdið, eisini kallað B.1.1.7.

Bæði tann smittaði persónurin og tann persónurin, ið viðkomandi hevur verið í sambandi við, hava tað gott, og í løtuni bendir einki á, at onnur í Føroyum eru smittað við bretska koronufrábrigdinum.

Í hesum føri verður bundið um heilan fingur, og tí verður tíðarskeiðið í sóttarhaldi víðkað til 14 dagar. Viðkomandi skal eisini vísa eina negativa roynd, áðrenn persónurin verður staðfestur frískur.